João 16:32 “Rona ba oras sei to’o mai, no to’o ona duni, katak imi sei namkari, ida-idak sei baa ninia uma”
Josiah Litch uza liafuan sira ne’ebé nakonu ho signifikadu bíbliku bainhira nia hakerek iha loron rua hafoin deziluzaun Outubru nian katak “loron nakukun—bibi sira namkari—no Na’i seidauk mai.” Vaziu espirituál ne’ebé kle’an sempre lori ba deziluzaun no namkari kristaun sira-nian.
Nune’e mós ho adeptu sira husi mensajen Miller nian kona-ba Jezús nia fila-fali iha finál 1844 no inísiu 1845. Ho liafuan badak, sira esperiénsia dezorientasaun no konfuzaun bainhira sira koko atu hetan signifikadu iha sira-nia esperiénsia moruk. Esperansa aas sira lori sira ba dezesperu ne’ebé klean.
Imposivel atu hetan imajen kompletu ida kona-ba deziluzaun hosi adeptu sira hosi mensajen Miller nian, maibé iha posibilidade katak maioria hosi sira abandona sira nia fiar Adventista no fila fali ba sira nia igreja antigu sira ka monu ba la fiar sekulár.
Ita bele haree sira ne’ebé iha nafatin esperansa iha Kristu nia fila-fali ne’ebé besik ona nu’udar grupu ida hosi grupu tolu ne’ebé forma. Pergunta boot ne’ebé sira hotu hasoru maka, saida, se iha buat ruma, akontese duni iha loron 22 fulan-Outubru, iha loron 2,300 nia rohan ne’ebé profetiza iha Daniel 8:14?
Grupu dahuluk ne’ebé mosu hafoin deziluzaun ne’ebé bele identifika maka espiritualista sira. Grupu Adventista sira-ne’e reklama katak movimentu ne’e loos, tantu iha termu data no eventu. Katak, Kristu mai iha loron 22 fulan Outubru. Maibé, Ninia mai maka mai espirituál ida iha sira nia fuan, la’ós fila-fali vizuál iha kalohan lalehan nian.
Ho interpretasaun ida-ne’e, sira foti pasu boot ida hosi Miller nia komprensaun kona-ba Bíblia. Sira hahú interpreta ida-ne’e espiritualmente, mezmu kona-ba buat sira ne’ebé ko’alia ho klaru kona-ba akontesimentu literál sira. No hodi halo nune’e, sira loke sira-nia an ba bosok espiritualista oioin.
Fanatizmu mosu ho fasil entre espiritualista sira-ne’e. Balun reklama katak tanba sira iha reinu, sira nesesariamente laiha sala no livre hosi sala. Entre grupu ida-ne’e, balun foti feen-la’en “espirituál”, ne’ebé tuir loloos hamosu rezultadu sira ne’ebé la espirituál tebes. Ema seluk argumenta katak tanba sira iha sétimu miléniu, serbisu ne’e sala. No sira seluk tan, tuir mandamentu bíbliku katak membru sira reinu nian sei sai hanesan labarik ki’ik sira, soe garfu no katana sira, han ho sira nia liman, no rasta ho sira nia liman no ain-tuur. La presiza atu hatete, esplozaun ida hosi entuziazmu karismátiku hale’u sira nia fileiras.
Iha lisaun importante ida ba ita iha ne’e. Ita presiza kuidadu no matenek kuandu ita lee Maromak nia Liafuan. Atu rejeita signifikadu loloos Eskritura nian maka atu loke ita-nia an ba dezastre espirituál.
