1 Korintu 14:40 “Maibé buat hotu-hotu halo ho di’ak no tuir orden”
Atu lori orden ba desordem ne’e. Ne’e maka saida maka Adventista sira presiza iha primavera tinan 1845. Pelumenus ida-ne’e maka Joshua V. Himes hanoin. Nia bele haree ho klaru katak sira ne’ebé maka dehan katak sira maka líder espirituál fanátiku sira sei lori movimentu ne’e ba estragu.
Maibé, sira nia fanatizmu la’ós de’it buat ida ne’ebé halo Himes diferente. Nia mós la konkorda katak profesia sai loos ona iha Outubru 1844. Hanesan ita haree ona antes, espiritualista sira reklama katak profesia sai loos ona—katak Jesus tama iha sira nia fuan iha loron 22 Outubru 1844, katak profesia loron 2.300 nian sai loos ona, no katak sira loos kona-ba akontesimentu no tempu no eventu.
Himes ikusmai deside katak hanorin Millerite nian sala kona-ba tempu maibé loos kona-ba saida maka tenke akontese iha loron 2,300 nia rohan. Ho liafuan seluk, laiha profesia ida maka kumpre iha loron 22 fulan-Outubru, maibé sira tenke kontinua hein ba Jezús nia fila-fali iha kalohan sira iha tinan balun tuirmai iha “tempu disputável”. Iha prosesu atu hetan konkluzaun ne’e, Himes hahú ona, iha fulan-Novembru 1844, atu abandona Miller nia komprensaun kona-ba profesia. Ikusmai, nia lori sira ne’ebé tuir nia movimentu hadook an hosi komprensaun kona-ba profesia ne’ebé maka alimenta no fó enerjia ba Miller nia evanjelizasaun.
Maibé, laiha rohan ida-ne’e ne’ebé klaru ba ema ida iha primavera tinan 1845. Buat hotu ne’ebé Himes hatene maka sira tenke hadook-an hosi hanorin falsu sira hosi fanátiku sira. Tauk hanesan ne’e maka dudu Miller ne’ebé moras beibeik no fraku ba beibeik atu hamutuk ho Himes nia grupu iha fulan-Abril nia rohan tinan 1845. Himes konvense ona William atu hamutuk ho nia iha konferénsia ida ne’ebé sei loke iha loron 29 fulan-Abril iha Albany, Nova Iorke. Iha ne’ebá, maioria Adventista sira organiza iha denominasaun ida ho baze doutrinál no aprosimasaun organizasionál ne’ebé konsistente ho kongregasionalizmu.
Insidente Albany nian maka buat di’ak ida tanba ida-ne’e tenta atu kria orden iha kaos nia leet. Infelizmente, ida-ne’e la ajuda tanba ida-ne’e haketak grupu Millerite hosi komprensaun profesia sira ne’ebé maka fó moris no signifikadu ba sira. Problema subjasente maka sira nia motivasaun prinsipál maka atu define sira nia movimentu tuir saida maka sira kontra. Sira monu ba kuak hodi halo teolojia atu sai diferente de’it hosi sira ne’ebé hale’u sira. No hodi halo nuneʼe, sira lakon sira-nia ekilíbriu.
Tulun ami, Na’i, atu tau matan ba Ita-boot nia Liafuan no la’ós ba problema sira hosi ema sira ne’ebé hale’u ami bainhira ami koko atu moris ami nia loron sira.
