Lamentasaun 3:40 “Mai ita hanoin no haree klean ba ita nia hahalok fila fali ba Na’i”
Iha nia viajen ikus (depois nia konversaun), Bates fiar katak nia knaar la’ós de’it atu konverte nia ema sira ba sai Kristaun, maibé mós atu asegura katak sira nia hahalok hanesan Kristaun sira, maski sira seidauk sai Kristaun loloos.
Entaun iha loro-matan monu iha loron 9 fulan Agostu tinan 1827 (loron ne’ebé sira sai hosi portu), nia halibur nia tripulasaun no hato’o regra no regulamentu sira ne’ebé sira tenke tuir durante viajen. Ida-ne’e tenke halo mariñeiru sira ne’ebé maka hamriik iha nia oin hakfodak. Laʼós deʼit sira tenke para atu koʼalia aat, maibé sira mós tenke hatudu respeitu ba malu hodi uza sira-nia naran loloos, laʼós apelidu. Regra ida ne’ebé radikál liu maka iha Domingu sira bainhira iha portu, sira labele sai hosi ró. Envezde, kapitaun deklara, “ita sei mantein Sábadu” iha ró laran.
Tripulasaun barak liu nonook no hakfodak ho anúnsiu ida-ne’e. Balun hato’o sira nia hanoin, maibé saida maka sira bele halo? Atu oinsa mos, sira iha ona tasi laran iha viajen ida ne’ebé provavelmente sei lori maizumenus fulan 18.
Maibé bomba loloos seidauk nakfera. Bates anunsia katak sira nia ró, Empress, sei sai ró ida ne’ebé laiha alkol. Labele serve tua ka tua-manas iha ró laran, no se nia bele, nia sei konvense sira atu la hemu, maski iha rai-maran.
Iha momentu ne’ebá maka Bates hakru’uk no dedika nia-an no nia ekipa ba Maromak.
Hanesan ne’e maka atmosfera ne’ebé maka tenke sai viajen estrañu ida ba tripulasaun. Ita lahatene sira nia sentimentu hotu, maibé membru tripulasaun ida hakilar katak sira iha “inisiu di’ak tebes”. No pelumenus ida seluk hanoin katak ida-ne’e maka inísiu ne’ebé aat tebes.
Durante viajen, Bates hahú hetan komprensaun di’ak liu kona-ba Sábadu. Durante viajen, nia lee pelumenus dala rua livru, Diskursu Lima kona-ba Sábadu, hosi Seth Williston. Iha leitura dahuluk, Bates admiti katak nia laiha ideia katak Bíblia iha buat barak atu hatete kona-ba tópiku ne’e. Loos duni, nia nota, “loron ne’e muda ba loron dahuluk semana nian” hodi hanoin fali faktu katak iha loron dahuluk ne’ebá “ita-nia Salvadór moris hi’as ho triunfu hosi rate”. Liutiha semana balu, nia hakerek katak “bainhira haʼu lee no medita liután kona-ba loron santu neʼe [Domingu], haʼu sai konvensidu liután kona-ba importánsia atu mantein loron neʼe santu.”
Kristaun lori mudansa ida iha Bates nia moris. Ida-ne’e transforma parte hotu-hotu. Ida-ne’e maka oinsá ida-ne’e tenke sai se ita hetan ona Kristu nu’udar Salvadór no Na’i. Atu tuir Ninia ain-fatin signifika moris ida ne’ebé diferente tebes hosi mundu ne’ebé hale’u ita.
