2 Pedro 3:13 “Maibé tuir Ninia promesa, ita hein lalehan foun no mundu foun, ho moris loos ne’ebe hela iha ne’eba”
Bates rona uluk hanorin kona-ba Kristu nia fila-fali ne’ebé besik ona liuhosi pastor lokál ida. Maibé, ideia ne’e la mosu to’o tinan 1839. Iha Outubru ne’ebá, nia rona William Miller haklaken katak Kristu sei fila fali maizumenus iha tinan 1843.
Bainhira Bates rejeita ideia ne’e, ema ida hateten ba nia katak Miller uza versíkulu Bíblia nian barak atu prova nia pontu. Lakleur depois, Bates tuir enkontru Adventista sira no “hakfodak tebes atu hatene katak ema ruma bele hatudu ba tempu Salvadór nia mai daruak.” Iha dalan atu fila ba uma husi palestra dahuluk, nia deklara ba nia feen, “Ne’e maka lia-loos.”
Etapa tuirmai maka atu lee Miller nia livru, Evidénsia Husi Eskritura no Istória kona-ba Kristu nia Vinda Daruak, Kona-ba Tinan 1843. Bates simu ho laran tomak Miller nia hanorin sira, sai hanesan aderente dahuluk ba Miller nia mai daruak hodi sai Adventista Loron Hitu nian.
Miller nia hanorin sira domina lalais Bates nia moris, ikusmai konsume tempu ne’ebé nia dedika uluk ba reforma sosiál. Iha tempu ne’ebá, belun balu husu ba nia tansá nia la tuir ona enkontru sosiál sira anti-alkol no anti-eskravidaun. “Ha’u nia resposta maka,” nia hateten ba sira, “katak hodi simu doutrina kona-ba Salvadór nia mai daruak, ha’u hetan tempu barak atu prepara ha’u-nia an ba eventu ne’ebá, no atu ajuda ema seluk mós prepara, no katak ema hotu ne’ebé simu doutrina ne’e sei no tenke sai defensór sira anti-alkol no anti-eskravidaun nian.”
Bates kontinua hodi hateten ba nia belun sira katak “bele realiza buat barak liután hodi serbisu iha fonte” problema nian. Afinal, buat aat ne’ebé grupu reformasaun oioin buka atu halakon maka rezultadu husi natureza sala-na’in umanidade nian. Tanba ne’e, Kristu nia fila-fali sei lori “destruisaun totál no imediata ba buat aat hotu”. Nune’e, Miller nia hanorin sira sai hanesan “reforma ikus liu” ba Bates. Nia konklui ona katak “ema aat sira labele hadi’a buat aat sira.” Kristu nia mai sei sai solusaun úniku ne’ebé loos no permanente.
Husi inísiu, Bates sai hanesan líder xave ida iha Miller nia hanorin sira, nu’udar ida hosi ema na’in 16 ne’ebé konvoka sesaun dahuluk Konferénsia Jerál nian iha tinan 1840 no prezide sesaun hanesan iha fulan-Maiu tinan 1842.
Responsabilidade ida-ne’e tau nia iha pozisaun ida atu ikusmai inisia revival Adventizmu loron Sábadu nian iha dékada 1840 nia rohan.
Maromak dirije Bates nia moris pasu ba pasu. No Nia halo hanesan ba ita-boot no ha’u. Ita-nia knaar la’ós atu hakat liu nia, maibé atu tuir Ninia lideransa loron ba loron.
