Eclesiastes 12:1 “Agora, hanoin hetan o nia Kriador, iha o nia tempu joven, molok loron susar mai, no molok tempu hakbesik baihira o dehan “hau la kontente ho loron sira ne’e”
Bainhira ha’u halo orasaun hela iha altár família nian, Espíritu Santu tun mai ha’u, no ha’u hanesan semo aas liután, dook liu mundu nakukun. Ha’u hateke fila hodi buka Adventista sira iha mundu, maibé la hetan sira, bainhira lian ida dehan mai ha’u, ‘Haree fali, no hateke aas uitoan.’. Rona ida-ne’e ha’u foti ha’u nia matan, no haree dalan ida ne’ebé loos no kloot, ne’ebé aas aas liu mundu. Iha dalan ne’e Adventista sira halo viajen ba sidade, ne’ebé iha dalan nia rohan” (Early Writings, p. 13). Liafuan sira-ne’e halo parte iha istória kona-ba Ellen G. Harmon, ho tinan 17, nia vizaun lalehan dahuluk iha Dezembru 1844.
Ellen ho nia alin-feto kaduak moris nu’udar oan ikun hosi oan na’in ualu iha Gorham, Maine, iha loron 26 fulan-Novembru tinan 1827. Nia aman, ema ne’ebé halo xapeu no fa’an, ikusmai muda família ba Portland, Maine.
Iha Portland, Ellen ho tinan 9 hetan asidente ne’ebé afeta tebes nia. Nia hetan tuda iha oin ho fatuk hosi nia kolega ida, no nia besik atu mate durante semana balu. Ikusmai nia rekupera, maibé esperiénsia ne’e halo nia iha saúde ne’ebé ladi’ak tebes, maski nia esforsu maka’as, nia labele kontinua nia eskola formál. Saúde ne’ebé ladi’ak kontinua atu fó-terus ba nia iha nia moris tomak.
Maibé, ninia inkapasidade atu tuir eskola la hapara ninia edukasaun informál. Ninia esbosu autobiográfiku sira hatudu nia hanesan feto foin-sa’e ida ho hanoin ne’ebé maka’as no natureza ne’ebé sensivel. No nia biblioteka pesoál nia medida iha momentu nia mate hatudu katak nia lee barak iha dixiplina oioin.
Ninia sensibilidade la’ós de’it sai evidente iha ninia relasaun sira ho ema seluk, maibé mós ho Maromak. To’o ita, haree lalais ba nia autobiografia hatudu katak nia relijiozu tebes hahú kedas iha tempu ne’ebé nia bele hanoin.
Hanoin kona-ba Jezús nia fila-fali iha tinan balun, halo Ellen ne’ebe sei kiik ne’e trauma. Nia hasoru hanorin ida-ne’e ba dala uluk iha tinan 8 bainhira, iha nia dalan ba eskola, nia hetan surat-tahan ida ne’ebé hateten katak Jezús sei fila fali iha tinan balun nia laran. “Ha’u hetan ta’uk,” nia hakerek. “Ida-ne’e impresionadu tebes iha ha’u nia hanoin… ne’ebé ha’u labele toba durante kalan balu, hodi halo orasaun beibeik atu prontu bainhira Jezús mai” (LS 20, 21).
Ellen White nia esperiénsia uluk nian ajuda ita atu haree lia-loos katak buat balu ne’ebé ita ta’uk ikusmai bele sai ita-nia esperansa, liuliu bainhira ita hahú komprende di’ak liután Maromak nia karakter.
