1 Tesalónika 4: 16-18 “Tanba Nai rasik sei tun mai husi lalehan ho lian makaas, ho lian husi anju bo’ot, no ho lian husi Maromak nia korneta. No sira ne’ebe mate iha Kristu sei sae uluk. Depois ita ne’ebe sei moris hela sei sae hamutuk ho sira iha Kalohan laran hodi hasoru Nai iha loron leten. No ita sei hamutuk nafatin ho Nai. Nune’e fo korajem ba malu ho liafuan ne’e”
Liafuan sira-neʼe fó kmaan duni! Liafuan sira-neʼe fó kmaan liuliu ba joven Ellen Harmon. Ninia deskoberta kona-ba Maromak nu’udar “inan-aman ne’ebé hadomi” fó enerjia ba nia atu fahe notísia kona-ba Kristu nia mai daruak atu ema seluk bele prepara ba eventu ksolok nian ne’ebá.
Kontráriu ho nia natureza moe, nia hahú halo orasaun iha públiku, fahe ho ema seluk iha enkontru klase Metodista nia fiar iha Jezús nia kbiit salvasaun no Ninia fila-fali lalais, no nia mós hetan osan hodi sosa materiál imprime sira hodi habelar doutrina Adventista.
Atividade ikus ne’e halo nia kole. Tanba nia saúde ne’ebé ladi’ak, nia hala’o nia knaar sira ho toba iha kama, halo meias ho folin 25 sentavus loron ida. Nia fiar ne’ebé maka’as sai evidente iha aspetu hotu-hotu iha nia moris. Ida-ne’e lori nia kolega barak ba fiar iha Jezús.
La’ós de’it Ellen iha paixaun kona-ba lia-loos Adventista nian ne’ebé Miller haklaken, maibé mós nia inan-aman no maun-alin sira. Maibé, kongregasaun Metodista lokál, ne’ebé hanorin katak Kristu sei la fila fali to’o liutiha períodu tinan 1,000 dame no rikusoin nian, la apresia movimentu ba hanorin kona-ba Kristu nia fila-fali iha tempu badak. Nune’e, iha fulan-Setembru tinan 1843, kongregasaun hasai Harmon sira hosi sira nia membru igreja nian.
Sira nia esperiénsia hanesan ho ema barak seluk nian, tanba Millerites iha fatin hotu-hotu lakohi nonook kona-ba tópiku Jezús nia fila-fali ne’ebé besik ona.
Ellen no maioria hosi Millerite sira seluk la preokupa liu kona-ba sira nia espulsaun hosi sira nia denominasaun oioin. Oinsa mos, Jesus sei fila fali iha fulan balun nia laran, no tuirmai sira nia susar hotu sei hotu. Ho esperansa ne’e, Millerite sira kontinua halibur hamutuk hodi fó korajen ba malu bainhira tempu ne’ebé maka profesia besik ona.
Ksolok nakonu iha sira nia fuan. Hanesan Ellen hatete tuir mai, períodu husi 1843 to’o 1844 “sai tinan ne’ebé kontente liu iha ha’u nia moris” (LS 59). Bainhira ita hanoin fali ba kotuk, ita realiza katak kristaun sira-ne’e sala kona-ba tempu ne’ebé sei mai, maibé sira la sala kona-ba esperansa ne’e rasik. Esperansa bensaun husi Jezús nia fila-fali kontinua hakonu ita-nia fuan ho ksolok bainhira ita prepara ba Nia mai.
