Apóstolu 17:11 “Ema sira ne’e hanoin diak liu ema tesalonika tanba sira simu liafuan ne’e ho neon pronto. Loro-loron sira buka hatene iha Eskritura sira atu haree se liafuan ne’e lo’os ka lae?”
Ellen White konkorda ho nia la’en no Bates kona-ba Bíblia mak sentru. Iha ninia livru dahuluk (1851), nia hakerek: «Ha’u rekomenda ba ó, doben lee-na’in, atu Maromak nia Liafuan sai ó-nia regra fiar no prátika nian» (EW 78). No tinan 58 liutiha, nia hamriik iha sesaun Konferénsia Jerál 1909 nian ho Bíblia iha nia liman, hodi dehan, “Maun-alin sira, ha’u rekomenda Livru ida-ne’e ba imi.” Ninia liafuan ikus sira ba igreja iha sesaun Konferénsia Jerál ne’ebá reflete diresaun husi ninia ministériu durante dékada neen liubá.
James White iha tinan 1847 halo alusaun ba Bíblia nia papél úniku hodi forma doutrina Adventista, hodi hateten katak Eskritura maka “ita-nia regra úniku fiar nian no prátika nian.” Iha kontestu hosi nia feen nia ministériu profétiku, nia hakerek katak “vizaun loloos sira fó atu lori ita ba Maromak no Ninia liafuan eskrita; tanba ne’e, vizaun sira ne’ebé fó regra foun sira fiar nian no prátika nian, ketak hosi Bíblia, ne’e la’ós hosi Maromak, tenke rejeita.”
Tinan haat liutiha, nia reafirma pontu ida-ne’e. “Kristaun ida-idak,” nia hakerek, “iha obrigasaun atu halo Bíblia sai ninia regra perfeitu fiar no devér nian. Nia tenke orasaun ho laran tomak ba Espíritu Santu nia tulun hodi buka Eskritura sira hodi deskobre lia-loos hotu no atu hatene ninia knaar tomak. Nia la livre atu fila kotuk ba Eskritura sira hodi aprende ninia knaar liuhusi prezente ruma. Ita dehan ida-ne’e tanba bainhira nia halo prezente sira-ne’e sala no foti pozisaun perigozu. Liafuan tenke iha oin, no kongregasaun nia matan tenke fiksa ba Liafuan ne’e nu’udar regra ne’ebé tenke obedese no fundamentu matenek nian atu aprende devér iha ‘obra di’ak hotu’.”
Ho liafuan badak, Adventista Loron Hitu nian sira uluk rejeita tradisaun, autoridade igreja nian, no mós don sira Espíritu nian hodi forma fundasaun ba sira nia doutrina.
Ho hanoin ida-ne’e, importante atu husu iha ne’ebé maka ita nu’udar Adventista sira (individuál no nu’udar kongregasaun sira) hamriik ohin loron kona-ba kestaun autoridade nian.
Iha kazu barak, parese, ita fraku iha Bíblia.
Ohin maka loron di’ak liu atu muda kestaun ne’e. Agora, bainhira ita-boot orasaun, ha’u hakarak ita-boot atu kompromete fali ba estudu Bíblia loroloron nian ne’ebé sériu. Tanbasá la hahú ho Evanjellu sira, Paulo nia karta sira, ka Salmo sira?
Maibé, buat ne’ebé importante la’ós iha ne’ebé maka ita-boot hahú ita-boot nia estudu, maibé, iha espíritu pioneiru Adventista sira-nian, ita-boot kompromete atu estuda Bíblia pelumenus meia-ora loron-loron. Ha’u hatene ida-ne’e sei interfere ho ita-boot nia tempu iha televizaun. Maibé ida-ne’e buat di’ak ida.
