Mateus 5:18 “Tebes Ha’u hatete loloos ba imi: To’o lalehan no rai lakon, pontu ida ka asentu ida sei la lakon husi lei, to’o buat hotu sai lo’os ona.”
Ida hosi maktuir Baptista Loron Hitu nian ne’ebé maka iha influénsia liu, ne’ebé maka halo interasaun ho Millerites maka Rachel Oakes. Iha inísiu tinan 1844, nia la’ós de’it simu mensajen Adventista nian maibé mós fahe nia hanoin sira kona-ba Sábadu ho kongregasaun Adventista iha Washington, New Hampshire, iha ne’ebé nia oan-feto (Sra. Cyrus Farnsworth) maka membru ida.
Nia konverte dahuluk, aparentemente, maka William Farnsworth, ne’ebé uluk konvense nia kona-ba Miller nia hanorin sira.
Ema seluk ne’ebé nia lori ba loron Sábadu maka Frederick Wheeler, ne’ebé, bainhira haklaken iha igreja Washington nian, hatete katak ema hotu ne’ebé profesa komuñaun ho Kristu tenke “prontu atu tuir Nia, no atu kumpre Maromak nia ukun-fuan sira iha buat hotu.”
Depois Rachel Oakes fó hanoin ba Wheeler kona-ba liafuan sira hosi nia sermón. Nia hatete, “Ha’u kuaze hamriik iha serbisu nia klaran iha loron ne’ebá, no hakarak hatete buat ruma.” “Saida maka ita-boot hakarak hatete?” Wheeler husu.
“Ha’u hakarak hateten ba ó katak di’ak liu ó hamoos meza komuñaun nian no taka ho hena, to’o ó hahú halo tuir Maromak nia ukun-fuan sira.”
Wheeler hakfodak uitoan ho atake frontál. Tuir mai nia hateten ba belun ida katak “Sra. Oakes nia liafuan sira hakanek nia liu fali buat hotu ne’ebé nia rona antes.” Maibé tuirmai nia hanoin fali kona-ba sira, estuda Bíblia kona-ba tópiku neʼe, no lakleur komesa halo tuir Sábadu ba loron hitu.
Ne’e aparentemente akontese iha Marsu 1844. Tuirmai, membru balu hosi kongregasaun Washington nian hamutuk ho Wheeler no William Farnsworth hodi fó onra ba Sábadu bíbliku.
Se karik ha’u to’o iha Reinu Lalehan nian, ema ida ne’ebé ha’u hakarak buka maka Rachel Oakes. Nia tenke ema ida ne’ebé loos. Menus liu ne’ebé ita bele hatete kona-ba nia maka nia la moe atu fahe nia fiar sira. Maromak fó lian ba nia, no nia uza ida-ne’e atu habelar lia-loos kona-ba Maromak nia loron Sábadu. Ha’u lahatene se nia aprosimasaun ne’e sentradu iha Kristu ka ofensivu uitoan, maibé ha’u fiar katak ida-ne’e di’ak tanba Wheeler, ministru Metodista ida, la hadook an hosi nia tanba irritasaun ka ofensa.
Rachel Oakes nia lisaun ida maka ita nunka hatene influénsia hira maka ita iha ba ema seluk. No ida-ne’e aplika ba ita hotu. Ita-boot inklui.
