Ellen G. White: Nia Moris, Ministériu no Kontribuisaun ba Igreja Adventista

1. Sé mak Ellen G. White?

Ellen G. White mak ida husi pioneiru importante sira iha Igreja Adventista do Sétimo Dia. Nia iha kontribuisaun boot ba dezenvolvimentu igreja, reforma saúde, edukasaun kristaun no moris espirituál.

Nia moris hatudu matenek, lideransa espirituál no vontade atu servisu ba Maromak. Nia hakerek livru, artigu no dokumentu barak ne'ebé fó konsellu prátiku no espirituál ba ema Kristaun.

Nia hakerek sira nia objetivu mak atu ajuda ema komprende Liafuan Maromak, hametin fiar no prepara an ba fila-fali Jesus.

2. Nia moris no bolu ba ministériu

Ellen G. White moris iha loron 26 fulan Novembru tinan 1827, iha família Harmon, iha Maine, Estadus Unidus. Nia mak oan ikus husi oan na'in ualu.

Nia moris iha família Metodista devotu. Bainhira nia simu pregasaun William Miller kona-ba Jesus sei fila-fali, família ne'e sai husi Igreja Metodista.

William Miller estuda profesia iha livru Daniel no Apokalipse, no nia fiar katak Jesus sei fila-fali mai iha mundu. Nia no nia seguidór sira hein Jesus atu fila-fali iha 22 Outubru 1844. Maibé Jesus la fila-fali iha loron ne'e, no akontesimentu ne'e sai hanaran “Dezamparasaun Boot” (The Great Disappointment).

Maski sira sente triste, Ellen no fiar-na'in balu kontinua estuda Bíblia atu buka komprensaun kle'an liu kona-ba profesia.

Iha tinan 1846, Ellen kaben ho James White. Sira hamutuk ho fiar-na'in seluk kontinua estuda Bíblia no simu loron Sábadu nu'udar loron Sabadu bíbliku. Movimentu ne'e sai parte importante husi prosesu ne'ebé lori ba fundasaun ofisiál Igreja Adventista do Sétimo Dia iha tinan 1863.

3. Bíblia mak fonte verdade

Ellen G. White sempre hatudu katak Bíblia mak padraun prinsipál ba fiar no moris kristaun. Nia hakerek sira la'ós atu troka Bíblia, maibé atu lori ema fila fali ba estudu no komprensaun Liafuan Maromak.

Nia hakarak ema komprende Maromak ne'ebé sira adora no prepara sira-nia fuan ba Jesus nia fila-fali.

Nia mós aviza ema atu la depende de'it ba hanoin umanu ka tradisaun, maibé atu koko ensinamentu hotu-hotu tuir Bíblia.

4. Konflitu entre di'ak no aat

Ellen G. White hanorin kona-ba konflitu boot entre Kristu no Satanás, entre verdade no sala, no entre di'ak no aat. Nia esplika katak konflitu ne'e afeta istória umanidade no mundu tomak.

Maski konflitu ne'e grave, nia fiar katak Maromak sei manán ikusmai. Jesus nia mate iha krús hatudu vensimentu boot hasoru sala no fó esperansa ba ema hotu ne'ebé simu Nia.

Tanba ne'e, fiar-na'in sira tenke hametin sira-nia relasaun ho Jesus no prepara an ba Nia fila-fali.

5. Jesus Kristu tenke sai sentru

Iha nia livru Steps to Christ, Ellen G. White esplika kona-ba domin Jesus nian, sakrifísiu Nia nian no dalan atu ema simu Jesus nu'udar Salvador.

Ba Ellen, krús Kristu nian mak sentru importante husi verdade bíblika. Ensinamentu hotu-hotu iha Bíblia tenke komprende iha naroman husi Jesus nia sakrifísiu.

Nia enkoraja ema atu simu Jesus, hahú moris foun ho Nia no hatudu domin Maromak nian iha moris loroloron.

6. Oinsá atu trata ema seluk

Ellen G. White fó atensaun boot ba relasaun entre ema. Nia uza karta, konsellu no ko'alia atu hametin ema ne'ebé hasoru difikuldade.

Nia hanorin katak kristaun sira tenke trata ema seluk ho domin, simpatia no kompaixaun, tuir ezemplu Jesus nian.

Metodu Jesus nian mak atu hakbesik ba ema, hatene sira-nia nesesidade, ajuda sira no harii fiar. Depois, ita bele konvida sira atu tuir Jesus.

Prinsípiu ne'e importante ba evanjelizmu no servisu igreja, tanba ita la bele ajuda ema ho di'ak se ita la rona no komprende sira-nia situasaun.

7. Esperansa kona-ba Jesus nia fila-fali

Ellen G. White fiar katak Jesus sei fila-fali mai iha mundu duni. Maibé nia la apoia determinasaun data ka oras espesífiku ba akontesimentu ne'e, tanba Bíblia hanorin katak Maromak de'it mak hatene loron no oras.

Nia enkoraja fiar-na'in sira atu kontinua estuda Bíblia, hakbiit fiar no fahe verdade kona-ba Jesus nia fila-fali ho klaridade no simplesidade.

Esperansa ne'e sai motivasaun ba fiar-na'in sira atu prepara sira-nia moris no kontinua hala'o misaun.

8. Edukasaun kristaun ne'ebé dezenvolve ema tomak

Ellen G. White fiar katak edukasaun labele foka de'it ba livru no koñesimentu akadémiku. Edukasaun loos tenke dezenvolve ema tomak: isin, hanoin no espiritu.

Edukasaun kristaun tenke prepara estudante sira atu servisu ba Maromak no sosiedade. Nia mós ajuda estudante sira dezenvolve kapasidade prátika, karakter no fiar.

Tanba ne'e, nia suporta harii eskola kristaun ne'ebé hanorin koñesimentu no prepara estudante sira atu moris ho objetivu no servisu ba ema seluk.

9. Kontribuisaun ba reforma saúde

Ellen G. White hanorin katak saúde di'ak inklui saúde fízika, mentál no espirituál. Nia fó importánsia ba hahán saudável, ezersísiu, higiene no kuidadu ba isin.

Nia enkoraja Adventista sira atu harii instituisaun saúde ne'ebé bele ajuda ema moras no ema ne'ebé sofre.

Iha Setembru 1866, Western Health Reform Institute loke iha Battle Creek, Michigan. Inisiativa sira hanesan ne'e sai parte husi dezenvolvimentu servisu saúde Adventista.

Nia hakerek sira kona-ba saúde no moris saudável kontinua iha influénsia ba ema barak to'o ohin loron.

10. Lisaun husi Ellen G. White nia moris

Maski Ellen G. White hasoru problema saúde, difikuldade família no dezafiu ekonomia, nia kontinua servisu tuir nia komprensaun kona-ba bolu Maromak nian.

Nia la hetan oportunidade atu kompleta tinan barak husi edukasaun formál, maibé nia kontinua aprende, hakerek no fó konsellu ba ema seluk.

Nia moris hanorin ita katak servisu ba Maromak la depende de'it ba kapasidade ka oportunidade ne'ebé ita iha, maibé mós ba ita-nia vontade atu hatán ba Nia bolu.

Nia husu ema atu hela besik ho Jesus, estuda Bíblia, hadomi ema seluk no moris ho domin no kompaixaun.

Konkluzaun

Ellen G. White nia kontribuisaun ba Igreja Adventista do Sétimo Dia inklui edukasaun, saúde, relasaun umana, estudu Bíblia no preparasaun ba Jesus nia fila-fali.

Nia mensajen prinsipál mak atu lori ema ba Jesus Kristu no ba Bíblia nu'udar fonte verdade. Nia ezemplu enkoraja ita atu moris ho fiar, kuidadu ba saúde, servisu ba ema seluk no kontinua fahe esperansa iha Jesus.

Ideia prinsipál: Hela besik ho Jesus, aprende husi Bíblia no hatudu Maromak nia domin liuhusi ita-nia moris no servisu ba ema seluk. (**

(**Full Artikel Bele le iha https://adventist.org/identity/history/ellen-white