Hametin Misaun Dijitál, Igreja Adventista Umatolu Partisipa iha Treinamentu OneVoice27

Umatolu, Timor-Leste (7 Novembru 2026) — Tim Media Timor-Leste Mission organiza treinamentu kona-ba implementasaun programa OneVoice27 ba membru Igreja Adventista do Sétimo Dia iha Umatolu, durante loron tolu, husi 6 to’o 8 Novembru 2026. Atividade ne’e nia objetivu mak atu equipa membru igreja ho estratéjia evangelizmu dijitál, hodi fahe mensajen salvasaun liuhusi mídia sosiál.

Além husi partisipa iha sesaun treinamentu, Tim Media Timor-Leste Mission mós hamutuk ho membru igreja iha Umatolu atu sabadu hamutuk. Prezensa ek partisipasaun husi ekipa ne’e simu ho entuziazmu boot husi membru igreja, liuliu iha sira-nia apoiu ba implementasaun programa OneVoice27 iha nivel igreja lokál.

Treinamentu ne’e sai parte ida husi esforsu Timor-Leste Mission atu hametin envolvimentu igreja lokál hotu-hotu iha servisu evangelizmu dijitál. Liuhusi utilizasaun mídia sosiál ho estratéjia ne’ebé apropriadu, espera katak membru igreja bele atinji ema barak liu, tanto iha sira-nia komunidade besik, nune’e mós ema sira ne’ebé sira kontaktu liuhusi plataforma dijitál.

Iha semináriu ne’e, aprezenta materiál estratéjiku oioin, hanesan AI Implementation for OneVoice27 and Hope Channel Timor-Leste Programs, OneVoice27 Strategy for Local Churches, Canva Design Workshop for the All Things New – OneVoice27 Program, Social Media Strategy for OneVoice27, no Hope Care Team Strategy.

Materiál sira ne’e prepara ho objetivu atu hadi’a kapasidade membru igreja iha produsaun kontéudu dijitál ne’ebé kreativu, relevante no orientadu ba misaun. Partisipante sira mós hetan koñesimentu kona-ba utilizasaun Inteligénsia Artifisiál (AI), dezeñu gráfiku, no estratéjia komunikasaun dijitál ne’ebé efetivu atu suporta servisu evangelizmu.

Iha nia sermão, Pastor Lucio Dias Fernandes enfatiza katak Jesus Kristu tenke sai sentru ba atividade hotu-hotu ne’ebé halo iha mídia sosiál. Ho baze ba Mateus 3:3, nia konvida membru igreja atu halo avaliasaun ba kontéudu ne’ebé sira haree no mensajen ne’ebé sira fahe ba públiku.

“Ema barak uza mídia sosiál atu hetan informasaun. Pergunta mak, saida mak ita haree iha mídia sosiál? Ida ne’e presiza ita hanoin hamutuk: saida mak ha’u haree no saida mak ha’u halo iha mídia sosiál?” Pastor Lucio hateten.

Nia kontinua hodi afirma katak postajen ida-idak tenke sai meiu atu hatudu no lori ema seluk atu koñese Kristu.

“Buat ne’ebé tenke sai sentru ba ita-nia atensaun iha mídia sosiál mak oinsá ema bele haree Jesus iha postajen ida-idak ne’ebé ita fahe,” nia kontinua.

Liuhusi treinamentu ne’e, Tim Media Timor-Leste Mission hein katak membru Igreja Adventista Umatolu sei komprende di’ak liu kona-ba importánsia atu uza mídia sosiál ho matenek, responsabilidade no orientasaun ba evangelizmu. Ho kapasidade dijitál ne’ebé aumenta, espera katak membru igreja ida-idak bele partisipa ativu iha fahe mensajen esperansa no salvasaun ba mundu.

Treinamentu ne’e mós sai pasu konkretu ida atu hametin implementasaun OneVoice27 iha igreja lokál, hodi transforma mídia dijitál nu’udar instrumentu estratéjiku ida atu lori ema barak liu ba Kristu. (**/red/tim