Iha tinan 1874, Igreja Adventista Sétimu Loron nian haruka nia misionáriu dahuluk, John Nevin Andrews, ba Suisa. Andrews maka matenek-na’in, eskritór, no líder igreja nian ne’ebé dedika nia moris hodi avansa evanjellu. Ninia misaun ba Europa marka inísiu movimentu ida ne’ebé sei habelar mensajen esperansa no salvasaun nian iha mundu tomak. Agora, tinan 150 liutiha, ita para atu selebra marku ida-ne’e, hodi reflete kona-ba legadu ida fiar nian, dedikasaun, no servisu nian ne’ebé kona ona moris barak no lori naroman evanjellu nian ba sikun sira ne’ebé dook liu iha rai.
Tanbasá Selebrasaun Ida-ne’e Importante
Aniversáriu ba dala 150 serbisu misionáriu Adventista nian la’ós de’it komemorasaun istórika ida; ida-ne’e maka lembransa maka’as ida kona-ba ita-nia bolu nu’udar igreja. Durante sékulu ida ho balun, mane no feto sira husik sira nia uma, dala barak ho sakrifísiu pesoál boot, hodi fahe Jezús nia domin iha kultura oioin no ambiente sira ne’ebé dezafiante. Selebrasaun ida-ne’e fó onra ba sira nia aten-barani, kompromisu, no moris barak ne’ebé maka transforma liuhosi sira nia serbisu.
Iha Divizaun Ázia-Pasífiku Súl nian, iha ne’ebé kampu misaun nian luan no oioin, aniversáriu ida-ne’e iha signifikadu espesiál. Ita-nia rejiaun, ne’ebé situa iha janela 10/40 nia laran, maka uma ba ema millaun sira ne’ebé seidauk rona mensajen evanjellu nian. Serbisu misionáriu sira nian, pasadu no prezente, iha área ida-ne’e sai importante tebes hodi habelar Maromak nia liafuan, no kontinua sai nu’udar faru esperansa nian ba sira ne’ebé buka lia-loos.
Komemora no Hakbiit
Enkuantu ita komemora marku signifikativu ida-ne’e, Divizaun Ázia-Pasífiku Súl nian la’ós de’it haree ba kotuk; ita hein ba oin. Selebrasaun ida ne’e nu’udar oportunidade ida atu inspira no hakbi’it jerasaun atuál atu lori nafatin espíritu misionáriu. Ami rekoñese katak mundu muda ona, no mós dezafiu sira serbisu misaun nian. Maibé, nesesidade ba misionáriu dedikadu sira maka krítiku ohin loron hanesan tinan 150 liubá.
Ami nia komemorasaun sei inklui série eventu sira, rekursu sira, no istória sira ne’ebé destaka istória no impaktu hosi misionáriu Adventista sira. Maibé importante liu, ida-ne’e sei sai hanesan bolu ida ba asaun ba Adventista sira hotu, joven no katuas, atu envolve iha serbisu misaun nian. Karik liuhosi meius tradisionál ka liuhosi aproveita teknolojia modernu, ema hotu bele hola parte iha fahe evanjellu.
Ami konvida ita-boot atu esplora seksaun espesiál ida-ne’e hosi ami nia website, iha ne’ebé ita-boot sei hetan istória inspiradora sira hosi misionáriu sira pasadu no prezente nian, rekursu sira atu ajuda ita-boot envolve, no informasaun kona-ba eventu sira ne’ebé sei mai. Hamutuk, mai ita fó onra ba legadu husi sira ne’ebé maka liu ona ita no kompromete ita-nia an ba misaun ne’ebé la’o hela atu fahe Jezús nia domin ho mundu.
