Maibé ó, oh ema Maromak nian, hadook an husi buat sira-ne’e hotu, buka justisa, adorasaun, fidelidade, domin, pasiénsia no laran-maus. Halo funu di’ak fiar nian, hadau moris rohan-laek, ba ida-ne’e mak Maromak bolu ó no ó jura ona konfisaun loos iha sasin barak nia oin. 1 Timóteo 6:11, 12. OFC 141.1
Ema barak hanorin katak fiar de’it iha Jesus to’o ona atu hetan salvasaun, maibé saida maka liafuan lia-loos nian hatete?—“Fiar lahó hahalok sira mate” (Tiago 2:26). Ita tenke “luta funu di’ak fiar nian, hadau moris rohan-laek”, foti krús, nega ita-nia an, luta hasoru isin, no tuir Redentór nia ain-fatin loroloron…. OFC 141.2
Sei sai sala ida atu hanoin katak laiha buat ida ne’ebé ita presiza halo atu hetan salvasaun. Ita-boot tenke koopera ho ajénsia sira lalehan nian…. Iha krús sira ne’ebé tenke hasa’e iha dalan, didin sira ne’ebé tenke sa’e molok tama iha sidade rohan-laek, eskada sira ne’ebé tenke sa’e molok to’o iha portaun pérola sira. No bainhira ita-boot realiza ita-boot nia laiha kbiit no frakeza no hakilar ba tulun, lian divinu ida sei mai hosi fortaleza sira lalehan nian hodi dehan, “Kaer metin ha’u nia forsa” (Isaías 27:5)…. OFC 141.3
Konflitu entre Kristu no Satanás mosu fali ba ema ida-idak ne’ebé husik bandeira metan hosi liurai-mane nakukun nian hodi marxa iha bandeira ran-fakar hosi liurai-mane Emmanuel nia okos. Ema aat sei aprezenta tentasaun sira ne’ebé sutil liu atu dada sira ne’ebé fiel ba Lalehan atu fila kotuk ba sira nia lealdade. Maibé, ita tenke fó ita-nia forsa tomak ba Na’i nia servisu, no nune’e ita sei hadook an hosi inimigu nia lasu sira…. OFC 141.4
Hahalok naran deʼit neʼebé halo fraku Ita-nia forsa fíziku ka mentál halo Ita la iha kbiit atu serbí Ita-nia Kriadór. Ita tenke hadomi Maromak ho ita-nia laran tomak, no se ita-nia matan hateke deʼit ba Ninia glória, ita sei han, hemu no hatais tuir Ninia hakarak. Ema hotu ne’ebé komprende signifikadu sai sarani sei hamoos an husi buat hotu ne’ebé hafraku no hafo’er. Nia ábitu moris nian hotu sei armoniza ho ezijénsia sira Liafuan lia-loos nian. Nia la’ós de’it fiar, maibé mós serbisu ba nia salvasaun ho ta’uk no nakdedar, enkuantu submete ba formasaun Espíritu Santu nian. Atu ha’u bele hatene nia, 115. OFC 141.5
(**Ellen G. White -Our Father Cares
