“Tanba Maromak mak Espíritu; no iha-ne’ebé iha Maromak nia Espíritu, iha-ne’ebá mós iha liberdade.”
(2 Korinto 3 : 17)
Fulan Novembru nu’udar fulan ida ne’ebé espesiál no istóriku ba nasaun Timor Leste. Ida ne’e tamba Maromak fo oportunidade tinan ida tan ba nasaun ida ne’e atu goja Maromak nia bensaun no sai bensaun ba nia povu.
Liafuan ukun an ne’e rasik jeralmente signifika katak ita nudar sidadaun Timor Leste livre ona husi kolonialismu/eskravidaun. Implísitamente dehan katak ita nu’udar sidadaun hotu-hotu livre atu espresa/atualiza ita-nia-an tuir ita-nia hakarak, ne’ebé konserteza la viola koridór regulamentu aplikavel sira. Entretantu, ko’alia kona-ba signifikadu loloos hosi liafuan ukun-rasik-an, ita bele hatán ba pergunta sira: tansá mak ema barak sei moris iha kiak nia laran? Tanba saida maka folin nesesidade báziku sira sa’e maka’as? Tamba dezempregu kontinua aumenta? Karik iha pergunta barak liután. Ita bele dehan nafatin katak ita livre duni?
Apóstolu Paulo fó hanoin mai ita ne’ebé livre ona husi sala atu sai atan ba justisa (Roma 6: 18), tanba ita sei hetan fuan ne’ebé lori ba santifikasaun no rezultadu ikus mak moris rohan-laek (versíkulu 22). Tanba Espíritu ne’ebé fó moris liberta ona ita iha Kristu hosi kastigu sala nian no ukun-fuan mate nian (Roma 8: 2).
Agora mai ita fila fali ba hatan ba pergunta iha leten, ukun rasik-an signifika saida ba ita? Hosi Paulo nia surat ita hatene katak Espíritu Santu iha ita nia laran halo ita sai livre. Sentimentu liberdade indika katak ita moris iha dame nia laran maski ita tenke hasoru luta oioin iha moris. Ita la ta’uk atu moris moris ne’e. Ami optimista no haree oportunidade sira iha problema sira nia kotuk. Ita bele foti risku sira nu’udar parte ida hosi opsaun sira ne’ebé ita halo. Normalmente ema ne’ebé sente nia livre mós sei liberta ema. Nia sei halo ema livre husi sira-nia hakarak. Nia mós sei halo ema seluk sente katak sira iha folin.
Husik Kristu ne’ebé liberta ona ita no sosa fali ita ho NIA raan kontinua hametin ita atu sai atan ba justisa, iha fatin ne’ebé de’it Maromak tau ita. Ita ida-idak tenke aprende nafatin atu sai fiel atu sai ema livre, pertense ba Maromak. Soli deo Gloria. (**/EppyM
