Lisaun 10
“Ministériu Kristaun ne’ebé maka Loos”
Sábadu Lokraik
Lee no Estuda Semana Ida-ne’e nian: 2 Kor 3:1-9; 2 Kor 4:7-18; 2 Kor 5:11-15; Kol 1:19-23; Ef 2:13-16; 2 Kor 6:11, 7:1; 2 Kor 7
Versu Memoria: “Ema haleu ami iha sor-sorin, maibé sira la kaer metin ami. Dalan atu sai la iha, maibé ami la lakon esperansa. (2 Kor 4:8_Bíblia Kadi)
Iha semana kotuk, ita haree katak Paulo, hodi afirma ninia simplisidade no sinseridade, defende nia an husi akuzasaun inkonstánsia no falta domin nian ba ema Korinto sira. Nia sempre serbisu ba interese di’ak liu ba nia oan espirituál sira. Nia hahú liña hanoin ida iha 2 Korintu 2:12–17 ne’ebé ba 2 Korintu 7. Enkuantu halo nune’e, nia reflete kona-ba saida maka ministériu loloos ba Kristu. Ita bele foti lisaun barak tebes hosi Paulo-nia hanoin sira kona-ba ida-ne’e.
Iha semana ida-ne’e, ita sei haree ba 2 Korintu 3-7, iha ne’ebé Paulo ko’alia kona-ba nia ministériu atu hetan klamar sira ba Kristu. Ellen G. White hateten, “Konversaun ema sala-nain sira-nian no sira-nia santifikasaun liuhusi lia-loos mak prova forte liu ne’ebé ministériu ida bele iha katak Maromak bolu nia ba halo ministériu. Evidénsia kona-ba ninia apostolu hakerek iha fuan sira ne’ebé konverte ona, no sai sasin husi sira-nia moris ne’ebé hafoun ho ministériu.”— The Acts of the Apostles, p. 328.
Estuda lisaun semana ida-ne’e nian hodi prepara ba loron Sábadu, 5 de Setembru.
Domingu * 30 de Agostu
Ai-fuan husi Ministériu Loloos
Lee 2 Korinto 3:1-9. Iha sentidu saida maka ita bele sai Kristu-nia karta ida?
_______________________________
Karta rekomendasaun sira maka komún iha mundu Gregu-Romanu. Maibé, Paulo la lori karta sira hanesan neʼe. Espíritu-nia kbiit transforma ba iha ema Korintu sira-nia moris maka prova ida ba nia ministériu loloos. Maibé, Paulo iha serteza katak laoss liuhusi nia intelijénsia ka esforsu sira maka igreja iha Korintu mosu (2 Kor. 3:4-6). Nia la envolve iha auto-promosaun (2 Kor. 3:5, 1 Kor. 2:2).
Paulo ko’alia kona-ba nia ministériu hodi diskute badak kona-ba aliansa rua: aliansa tuan ne’ebé reprezenta hosi Moisés no ida foun ne’ebé reprezenta hosi Paulo ho nia kolega sira. Ema neʼebé lee lalais bele hanoin katak aliansa tuan la fó esperansa ba salvasaun, maibé ida-neʼe la loos. Salvasaun disponivel iha aliansa tuan hanesan iha aliansa foun. Aliansa tuan maka evanjellu antesipadu. “No Eskritura, haree uluk katak Maromak sei justifika ema jentiu sira liuhusi fiar, haklaken uluk evanjellu ba Abrão, hodi dehan:”Nasaun hotu sei hetan bensaun liu husi ó'” (Gal. 3:8).
Iha 2 Korinto 3:1–4:6, ita bele haree katak aliansa tuan uza hodi simboliza esperiénsia legalista sira ne’ebé depende ba sira-nia obra obediénsia rasik nu’udar meiu ida atu halo Maromak kontente. Aliansa foun, maski nune’e, reprezenta esperiénsia ema sira-ne’ebé depende tomak ba Maromak-nia grasa atu halo buat hotu ne’ebé Maromak promete ba sira.
Paulo ko’alia kona-ba resposta rua ne’ebé la hanesan, hosi ema fiar-nain no ema la fiar-na’in, ba evanjellu. Nia la ko’alia kona-ba evanjellu oioin, ida iha Testamentu Tuan no ida seluk iha Testamentu Foun—tanba iha de’it evanjellu ida, ne’ebé oferese husi Maromak, “ne’ebé salva ona ita no bolu ita atu sai santu, laos tanba ita-nia hahalok , maibé tanba ninia planu no grasa, ne’ebe Nia fó nanis ona mai ita iha Kristu Jezús molok mundu hahú” (2 Tim. 1:9).
Segunda * 31 de Agostu
Terus no Glória
Lee 2 Korinto 4:7–18. Halo lista kona-ba Paulo nia terus sira. Oinsá nia tahan nia terus sira?
___________________________________
John Huss, reformadór boot husi Boémia antigu nian, dala ida hatete kona-ba Jezús, “Nia maka Nai ba mundu, no ita maka ema mortál sira-ne’ebé desprezavel—maibé Nia terus! Tanbasá, entaun, ita mós labele terus, liuliu bainhira terus maka ba ita purifikasaun ida?”—Ellen G. White, The Great Controversy, p. 105.
Apóstolu Paulo hatudu ona iha sékulu atus barak liubá nia vontade hanesan atu terus tanba Kristu. Nia hatene katak nia laos buat seluk maibé sanan frajil ida ne’ebé halo hosi rai-mean (2 Kor. 4:7). Nia sente beibeik presaun maka’as, konfuzaun, persegisaun, no baku, no maski nune’e nia la hetan harahun, iha dezesperu, abandona, ka destrui (2 Kor. 4:8, 9). Nia prontu atu lori “iha isin Jezús-nia mate, atu nune’e Jezús-nia moris” bele manifesta iha nia (2 Kor. 4:10, 11).
Hodi dehan “Jezús-nia mate”, karik Paulo hakarak temi kona-ba terus sira neʼebé nia temi iha versíkulu sira uluk. Iha nia fatin, iha sentidu imediatu, fraze “Jezús-nia moris” provavelmente refere ba libertasaun sira hosi mate ka kbiit espirituál ba moris atuál. Maibé, ikusmai, ida-ne’e maka referénsia ida ba moris-hias (2 Kor. 4:12).
Interesante, fraze “mate no moris” mosu dala tolu iha 2 Korinto 4:10-12. Ida-ne’e hanesan lembransa ida katak, iha era agora, moris kahur ho mate. Maibé, iha glória futuru, ita sei esperiénsia moris iha auzénsia mate nian (Apok. 20:14, Apok. 21:4).
Importante liu, 2 Korintu 4:7-18 hatudu katak evanjellu haklaken liuhosi ema frajil sira atu nune’e glória ba Maromak de’it (2 Kor. 4:15). Laos dala barak, misionáriu sira sofre iha sira-nia ministériu misionáriu nia laran. Maibé, ita-nia terus iha ne’e kmaan no momentu ida bainhira kompara ho folin rohan-laek glória nian ne’ebé hein ita (2 Kor. 4:17). Ema fiar-nain moris ho fiar, laos ho matan (2 Kor. 4:18, 2 Kor. 5:7).
Esperansa ida-ne’e iha moris futuru nian kaptura tebes Paulo-nia hanoin to’o nia ko’alia nafatin kona-ba ida-ne’e iha pasajen nia lala’ok (2 Kor. 5:1-10). Nia refere ba nia isin mortál ho metáfora uma rai nian.
Inversamente, “edifísiu husi Maromak” maka metáfora ida ba isin ne’ebé moris hias (2 Kor. 5:1), esperansa boot ba fiar-nain sira husi idade hotu-hotu
Tanba saida maka importante tebes katak, iha saida de’it maka ita hasoru daudauk, ita sempre rai esperansa moris-hias nian, ita-nia moris-hias (1 Kor. 15:52), iha ita-nia oin?
Tersa * 1 de Setembru
Ministériu Rekonsiliasaun ne’ebé foka ba Kristu
Lee 2 Korinto 5:11–15. Oinsá maka pasajen ida-ne’e hatudu katak Paulo nia serbisu sentradu iha Kristu?
_________________________
Paulo hatene katak nia tenke fó konta kona-ba nia serbisu ba Kristu (2 Kor. 5:10). Nia hatene “ta’uk Na’i” no buka atu konvense ema kona-ba Kristu nia evanjellu (2 Kor. 5:11). Tauk ida-ne’e maka reverénsia no hakfodak ba Kristu no, tanba ne’e, ida-ne’e kombina ho Paulo nia domin ba Kristu no konfiansa iha Kristu nia domin ba nia. Iha Testamentu Tuan, hamta’uk Na’i signifika la’o iha Nia dalan, hadomi Nia, no serbí Nia ho fuan no klamar tomak (Deut. 10:12).
Paulo nia serbisu la’ós foka ba nia an rasik maibé foka ba Kristu. Nia la gaba nia an rasik. Razaun ba nia gaba-an maka Kristu (2 Kor. 12:9). Nia hatete, “Maibé ha’u labele gaba-an, se la’ós iha ita Na’i Jezús Kristu nia krús” (Gal. 6:14, ESV). Nune’e, ema Korintu sira-nia oportunidade atu gaba-an kona-ba nia (2 Kor. 5:12) signifika atu orgullu ho ninia serbisu ne’ebé foka ba Kristu iha kontraste ho ninia adversáriu sira-nia serbisu ne’ebé foka ba nia an rasik.
Lee 2 Korinto 5:16-21, Kolosense 1:19-23, no Éfeso 2:13- 16. Saida maka Paulo hakarak hatete ho “ministériu rekonsiliasaun nian”?
________________________________
Kristu maka ministru rekonsiliasaun nian ho exelénsia. Nu’udar ida-ne’e, Nia “fó ministériu dame malu nian mai ami” (2 Kor. 5:18). Ideia kona-ba rekonsiliasaun mosu beibeik iha 2 Korinto 5:16–21. Ida-ne’e maka konseitu esensiál ida ba Paulo, no nune’e mós tenke sai ba ita.
Maromak rekonsilia ona umanidade ho Nia-an rasik liuhosi Nia Oan-Mane nia mate. Sira ne’ebé hetan rekonsiliasaun ho Maromak maka kriasaun foun (2 Kor. 5:17). Agora, sira tenke hato’o “mensajen rekonsiliasaun nian” ida-ne’e hodi haklaken Kristu nia evanjellu (2 Kor. 5:19). Iha sentidu ida-ne’e, “ita maka Kristu nia embaixadór sira, hanesan Maromak harohan liuhosi ita” (2 Kor. 5:20).
Hanoin kona-ba buat neʼebé Kristu halo ona ba imi. Hanoin kona-ba kulpa, sala, kondenasaun ne’ebé sei sai ita-boot nian maibé ba saida maka Nia halo ba ita-boot iha krús. Oinsá maka realidade ida-ne’e tenke fó impaktu ba oinsá ita-boot relasiona ho ema seluk, liuliu sira ne’ebé la hatene Nai?
Kuarta * 2 de Setembru
Bolu ba Santidade
Iha 2 Korinto 6:3-10, Paulo enkoraja nafatin ema Korintu sira atu hadame malu ho Maromak. Nia aprezenta lista naruk ida kona-ba susar no manan ba sira hodi hatudu saida maka signifika sai Kristu-nia seguidor no ministériu Maromak nian. Ho liafuan badak, nia lista situasaun difisil sira (2 Kor. 6:4, 5), virtude sira karakter nian (2 Kor. 6:6), ekipamentu ba serbisu (2 Kor. 6:7), no vizibilidade sira serbisu nian (2 Kor. 6:8-10). Hafoin fó instrusaun ba membru sira iha Korintu atu hadame malu ho Maromak, Paulo apela ba sira atu moris santu, no atu halo nune’e hodi haketak sira-nia an hosi influénsia aat hosi ema sira ne’ebé la fiar no hosi buat sira ne’ebé la moos (2 Kor. 6:14-17).
Lee 2 Korinto 6:11–7:1. Tuir pasajen ida-ne’e, saida maka moris santu haree hanesan?
__________________________
Paulo subliña iha pasajen ida-ne’e importánsia afetu no domin nian iha igreja laran (1 Kor. 6:11-13). Evidénsia katak ema sira hetan ona rekonsiliasaun ho Maromak maka sira buka rekonsiliasaun ba malu. Loos duni, sira sai, hanesan dehan, ajente sira rekonsiliasaun horizontál nian.
Tuir mai, bolun ba santidade fó liuhosi apelu neen, mak hanesan, (1) “Keta hamutuk ho ema sira ne’ebé la fiar” (2 Kor. 6:14); (2) “ ‘Sai husi sira nia leet’ ” (2 Kor. 6:17); (3) “ ‘Haketak’ ” (2 Kor. 6:17); (4) “ ‘Keta kona buat ne’ebé la moos’ ” (2 Kor. 6:17); (5) “Mai ita hamoos ita-nia an husi buat hotu neʼebé hafoʼer ita-nia isin no ita-nia espíritu” (2 Kor. 7:1); (6) “Halo santidade sai perfeitu iha hamta’uk ba Maromak” (2 Kor. 7:1; énfaze fornese). Ezortasaun sira-ne’e hatudu katak Maromak santu ezije moris santu no separasaun husi idolatria. Iha parte seluk, pasajen ne’e mós lori promesa hitu ne’ebé destaka papél igreja sarani nian nu’udar templu santu: (1) “ ‘Ha’u sei hela iha sira’ ”; (2) “ ‘[Ha’u sei] la’o iha sira nia leet’ ”; (3) “ ‘Ha’u sei sai sira nia Maromak’ ”; (4) “ ‘Sira sei sai Ha’u nia povu’ ”; (5) “ ‘Ha’u sei simu ó’ ”; (6) “ ‘Ha’u sei sai Aman ba imi’ ”; (7) “ ‘Imi sei sai Ha’u nia oan-mane no oan-feto sira’ ” (2 Kor. 6:16, 17, 18).
Haree katak promesa haat iha 2 Korinto 6:16 maka baze ba imperativu tolu iha 2 Korinto 6:17 (haree liafuan “tanba ne’e” iha inísiu 2 Korinto 6:17). Ida-ne’e hatudu katak santidade la’ós rezultadu hosi ema ida nia esforsu maibé serbisu hosi Espíritu Santu iha fuan. Maski santidade rezulta husi Maromak, fiar-na’in sira tenke halo sira nia parte no rejeita idolatria no prátika hotu-hotu ne’ebé la moos.
Saida maka Maromak-nia promesa sira iha 2 Korinto 6:16-18 hateten mai ita kona-ba saida maka santidade?
Kinta * 3 de Setembru
Konfortu no Ksolok
Lee 2 Korinto 7. Saida maka Paulo-nia sentimentu sira bainhira rona katak Ema Korinto sira arrepende ona?
____________________________
Domin hira maka suli hosi liafuan sira “Ita-boot iha ami nia fuan” (2 Kor. 7:3; haree mós 2 Kor. 6:11). Iha nia hakarak klean atu hetan nia domin, Paulo mós hatete, “Fó fatin iha imi nia fuan ba ami” (2 Kor. 7:2). Enkuantu fraze “iha imi nia fuan” la iha testu Gregu, maioria versaun Inglés fornese ida-ne’e, ne’ebé loos tanba kontestu apoia ida-ne’e.
Loos duni, ema Korintu sira loke sira-nia laran ba Paulo no ninia maluk serbisu-naʼin sira. Tanba ne’e maka versíkulu 4 maka ksolok ida ne’ebé maka’as. Paulo nia liafuan sira espresa oinsá pozitivu ninia sentimentu sira iha momentu ida-ne’e: “Ha’u-nia aten-barani boot tebes ba imi, ha’u-nia gaba-an boot tebes kona-ba imi, ha’u nakonu ho konsolasaun, ha’u haksolok tebes iha ami-nia susar tomak” (2 Kor. 7:4). Paulo nakonu ho konsolasaun no ksolok. Konfortu no ksolok hira maka ita-nia igreja sira bele lori ba sira nia ministériu sira-nia fuan hodi entrega sira-nia an ho laran-metin ba Kristu.
Iha 2 Korinto 7:5–16, Paulo esplika liután razaun ba nia konfortu no ksolok. Konseitu rua ne’e domina pasajen ne’e. Verbu parakaleō (“fó kmaan”) ka substantivu paraklēsis (“fó kmaan”) mosu hamutuk dala hitu iha 2 Korintu 7. Seksaun ida-ne’e hosi karta ne’e remata hanesan nia hahú, katak, ho kmaan barak iha Maromak (2 Kor. 1:3-7). Paulo-nia konsolasaun iha 2 Korintu 7 mai hosi kaman ne’ebé nia hetan tanba karta ne’ebé maka’as hamosu efeitu ne’ebé nia hakarak.
Maski alíviu ida-ne’e maka rezultadu hosi Tito nia relatóriu pozitivu, ikusmai, Maromak maka ajente hosi konsolasaun ne’ebé Paulo esperiénsia (2 Kor. 7:6). Maromak mak duni “Maromak konsolasaun tomak nian, ne’ebé fó kmaan mai ita iha ita-nia susar hotu” (2 Kor. 1:3, 4).
Interesante, enkuantu Paulo “nakonu ho konsolasaun”, nia “haksolok tebes” (2 Kor. 7:4, 7, 13). Maski nia karta ne’ebé maka todan hamosu tristeza barak, ida-ne’e maka tristeza ida tuir Maromak nia hakarak ho arrependementu
pretende (2 Cor. 7:9–11, NASB). Ema Korintu sira “triste iha dalan divinu” (2 Kor. 7:11), tristeza ida ne’ebé hamosu “arrependimentu ne’ebé lori ba salvasaun” (2 Kor. 7:10). Saida tan maka bele lori ksolok liután ba Maromak-nia ministériu loloos ba ita-nia fuan?
Ita-boot hetan ona tristeza ne’ebé tuir Maromak iha ita-boot nia moris? Oinsá ita-boot hatene katak ne’e tristeza tuir Maromak-nia hakarak atu lori ita-boot ba arrependementu?
Sexta * 4 de Setembru
Hanoin liután: Lee Ellen G. White, “The Message Heeded,” pp. 323–334, in The Acts of the Apostles.
Iha semana kotuk, ita lee pasajen ne’ebé temi iha leten iha Apóstolu sira-nia hahalok. Ida-ne’e vale atu lee filafali. Dala ida-ne’e, hanoin uitoan tan kona-ba parte sira ne’ebé refere ba Paulo nia karta ne’ebé maka’as, nia sentimentu sira bainhira hakerek ida-ne’e, no nia ksolok bainhira simu notísia di’ak kona-ba arrependementu sinseru hosi destinatáriu sira. Depois, hanoin kona-ba saida maka ida-ne’e hateten mai ita kona-ba autentisidade hosi Paulo nia serbisu no lisaun saida maka ita bele aplika ba ita-nia serbisu ba Kristu.
“Ita tenke revela ba universu, ba mundu ne’ebé monu no ba mundu sira ne’ebé la monu, katak iha perdaun ho Maromak, atu nune’e liuhusi Maromak nia domin ita bele hadame malu ho Maromak. Ema arrepende, sai arrependidu iha fuan, fiar iha Kristu nu’udar nia sakrifísiu expiatóriu, no realiza katak Maromak hadame malu ho nia.”—Ellen G. White, Testimoni Espesiál On Edukasaun, p. 223.
“Nu’udar igreja, ita simu ona naroman boot. Naroman ne’e Na’i fó ba ita atu fó benefísiu no bensaun ba mundu. Ho kbiit husi leten ita tenke husu ema atu hadame malu ho Maromak.”—White, Surat 32, 1903. Wainhira hadame malu ho Maromak, tenke buka santidade. Komenta kona-ba 2 Korinto 7:1, Ellen G. White fó hanoin kona-ba saida maka Paulo hakarak hatete ho “halo perfeitu santidade iha hamta’uk ba Maromak” (2 Kor. 7:1). Nia hatete katak Paulo buka atu ajuda konverte foun sira “atu sai auto-sufisiente, sarani sira ne’ebé buras, metin iha fiar, laran-manas iha laran-manas, no ho laran tomak iha sira nia konsagrasaun ba Maromak no ba serbisu atu habelar Ninia reinu.”— The Acts of the Apostles, p. 201.
Pergunta ba Diskusaun:
- Paulo refere ba ita nu’udar “sanan rai-mean nian” ne’ebé iha rikusoin evanjellu nian (2 Kor. 4:7). Oinsá maka faktu katak kondisaun umana fraku, fraku, no nakonu ho limitasaun sira bele hasa’e duké estraga anúnsiu evanjellu nian?
- Saida maka signifika sai “kriasaun foun” (2 Kor. 5:17)? Oinsá mak ida-neʼe kona ita-nia moris loroloron nian? Oinsá Kristu halo ita-boot sai kriatura foun?
- Iha 2 Korinto 6:4, 5, Paulo fornese lista naruk ida kona-ba susar sira tanba evanjellu. Oinsá nia hatán ba nia terus sira (haree 2 Kor. 6:6, 7)? Oinsá ida-ne’e ajuda ita-boot atu hatán ba ita-boot nian?
- Paulo kontrasta tristeza divina ho tristeza mundu nian (2 Kor. 7:10). Iha dalan saida maka tristeza bele iha relasaun ho arrependementu? Oinsá ita-boot deskreve tristeza divina nian kompara ho tristeza mundu nian?
